የባለራዕይ ወጣቶች ማህበር ሊቀመንበር በተፈበረከ መረጃ መንግስት ሊያስረው እንደሚፈልግ ገለፀ

“የኢህአዴግ ስርአት መወገድ አለበት፤ ሙሉ ጊዜዬን ለፖለቲካ ስራ በማዋል ስርአቱን ለመታገል ተዘጋጅቻለሁ”ሀብታሙ አያሌው
 የባለራዕይ ወጣቶች ማህበር አስተባባሪ ኮሚቴ ሰባሳቢ ወጣት ሀብታሙ አያልው ከፍኖተ ነፃነት ጋር ባደረገው ቃለምልልስ እንደጠቆመው መንግስት እሱን ጨምሮ የማህበሩን አመራሮች ለማሰር ዝግጅት እያደረገ እንዳለ መረጃ ደርሷቸዋል፡፡ ባለፈው ቅዳሜ በአንድነት ፓርቲ ጽ/ቤት አዳራሽ ሊያደርጉት የነበረው መስራች ጉባኤም የማህበሩ አባላት ባልሆኑና ለጊዜው ማንነታቸው ባልታወቀ ግለሰባች ከታወከና እንዲበተን ከተደረገ በኋላ 6 የማህበሩ አመራሮች እስከምሽቱ 12፡30 ድረስ በፖሊስ ቁጥጥር ስር ውለው እንደነበር ወጣት ሀብታሙ ጨምሮ ገልጧል፡፡

ላለፈው አንድ አመት የባለራዕይ ወጣቶች ማህበር ሊቀመንበር የሆነው ሀብታሙ አያሌው ከአሸባሪ ድርጅቶች ጋር ግንኙነት እንዳለው በማስመሰል በኢሜልና በስልክ የማያውቃቸው መልዕክቶች እየደረሱት እንደሆነ ለፍኖተ ነፃነት ገለፀ፡፡
በፈጠራ መረጃዎች ብዙዎች እንደታሰሩ ያስታወሰው ሀብታሙ ከዚህ መልዕክት ጀርባ በስውር የሚንቀሳቀሱ የመንግስት የደህንነት ሀይሎች እጅ እንዳለበት እንደሚያምን አስረድቷል፡፡ አያይዞም ያለው ስብዕናና ሀይማኖታዊ አስተዳደግ ከሽብርና ጥፋት ሊያቀራርበው እንደማይችል ተናግሯል፡፡
የባለራዕይ ወጣቶች ማህበር አባላትን “እንዴት ከሀብታሙ ጋር ትሆናላችሁ እሱ ከ ግንቦት ሰባት ጋር ግነኙነት አለው” በማለት በመንግስት ደህንነት ሀይሎች ሀሰተኛ ውንጀላ እየቀረበብኝ ነው በማለት አስረድቷል፡፡
ጨምሮም የማህበሩ አባላት የመንግስት ካድሬዎችና ደህንነቶችን ሴራ ለማጋነጥ እየተዘጋጁ መሆኑን ገልጧል፡፡
አሁን ባለው የኢትዮጵያ ሁኔታ በሲቪክ ተቋማት ተደራጅቶ ለውጥ ማምጣት ይቻላል ብሎ እንደማያምን የገለፀው ሀብታሙ አያሌው “የኢህአዴግ ስርአር መወገድ አለበት፤ ሙሉ ጊዜዬን ለፖለቲካ ስራ በማዋል ስርአቱን ለመታገል ተዘጋጅቻለሁ” ብሏል፡፡
ከሀብታሙ አያሌው ጋር ያደረግነውን ሙሉ ቃለምልልስ በድረ ገፃችን ላይ ያገኙታል፡፡   

CLICK HERE

 http://www.fnotenetsanet.com/?p=2986