ዜጎችን ሊታደጉ የማይችሉ የሃይማኖት መሪዎች ሊወገዱ ይገባል።






ዜጎችን መታደግ የማይችሉ በአስቸኳይ ቆባቸውን አውልቀው ከተራው ሕዝብ የመቀላቀል ግዴታ አለባቸው።
Minilik Salsawi (ምንሊክ ሳልሳዊ)

ቤተክርስቲያን እና መንግስት በኢትዮጵያ ውስጥ እጅና ጓንት ሆነው በኢትዮጵያውያን ላይ የማያባራ ጭቆና ማካሄድ ከጀመሩ ረዥም ዘመናት ተቆጥረዋል። ይብልጡኑ የመንግስቶች ጎህ ከቀደደ ጀምሮ በተለይ የተዋህዶ ሃይማኖት መሪዎች  አስፈሪ እና አስደንጋጭ እንዲሁም አሳዛኝ ደግሞም አሳፋሪ ቃላቶችን በመጠቀም ስጋዊ እና ምድራዊ ስልጣኖችን ለገዢዎች ለማደላደል ይህ ነው የማይባል ግፍ በምእመናኖቻቸው እን በሌሎች አማኞች ላይ ፈጽመዋል አስፈጽመዋል፤ እየፈጸሙ ነው፤ እያስፈጸሙ ነው። ይህ የማይዋጥለት አሊያም የሚክድ ካለ እውነት የማይደላው ብቻ ነው።

የኢትዮጵያ ጨቋኝ መንግስታት የሆኑ ከጥንት እስከ ዛሬ የተንሰራፉ በህዝብ ላይ የሚያደርጉት ጭቆና እና በደል ታሪክ የማይሽረው ጠባሳ በሰው ልጆች የትውልድ ሂደት ላይ መፍጠሩ እንደተጠበቀ ሆኖ የሃይማኖቶች ሚና ግን እጅግ በሚያሳዝን መልኩ ዜጎች በግፍ በጨቋኝ መንግስቶች ሲታረዱ በመባረክ የመንግስታቱን እድሜ አስረዝመዋል አሁንም እያስረዘሙ ነው። የመንግስት እና የሃይማኖት ቁርኝት የሚፈለገው ስልጣንን አደላድሎ ለመያዝ እና ህዝብን ረግጦ ለመግዛት ካለ ምኞት እንጅ ለዜጎች ከመቆርቆር የመነጨ አይደለም። የሃይማኖት አባቶች በሃይማኖታዊ የመንፈስ ጥኡም ሰበካና ዜማ ጋር በማጣፈጥ የጨቋኞችን የበላይነት በመስበክ ማስፈራራት እና ማሸማቀቅ የጳጳሳት እና የሼህዎች አብይ ተግባር ነው።
በኢትዮጵያ ውስጥ ተገዝተው አሊያም አድርባይ ሆነው  በመስራት ላይ ያሉ የሁሉም ሃይማኖት መሪዎች እጅግ ጥንቃቄ በጎደለው ሁኔታ በዜጎች ላይ የሚደርሱ ግድያዎች ድብደባዎች እስሮች እና መንገላታቶችን እንደ አንድ መንፈሳዊ የሃይማኖት መሪ እንደ ሰብአዊ ተፈጥሮ አሊያም መጽሃፋቸው እንደሚያዛቸው ለዚጎች ሲደራደሩ ሲከራከሩ ሲዋያዩ ሲሆንም አንተም ተው አንተም ተው ሲሉ አልታዩም ከዚህ በከፋ መልኩ በልማታዊ ዲሞክራሲ የፖለቲካ ፉጨት ስር ተደብቀው በለው በሚል አብዮታዊ ዜማ ዜጎችን እያስፈጁ ይገኛሉ።

አንድ የሃይማኖት አባት የታመመ ሲጠይቅ፤ የሞተ ሲቀብር ፤የተቸገር ሲረዳ ፤የታሰረ ዞሮ በመጎብኘት ሲያጽናና እንጂ ሲፖተልክ አሊያም ሲወሸክት ማየት ያማል። በሃገራችን ምእመናንን እንምራለን የሚሉ ሕዝብን መንፈስ እንመግባለን የሚሉ የለሊት ወፍ የሆኑ የክርስትና እና እስልምና የሃይማኖት መሪዎች ዜጎችን መታደግ የማይችሉ ከሆነ በአስቸኳይ ቆባቸውን አውልቀው ከተራው ሕዝብ መቀላቀል ግዴታ አለባቸው። ይህ ጉዳይ የብዙሃኑ የዜጎች ጉዳይ ስለሆነ ክርስቲያን እስላም የሚባልበት ሳይሆን የኢትዮጵያውያን የጋራ ጉዳይ ነው።



በሃገሪቱ ዜጎች በአለም ላይ ታይቶ በማይታወቅ ሁኔታ በነጻነት በመጻፋቸው የእኩልነት እና የነጻነት ጥይቄ በማንሳታቸው ብቻ አሸባሪ ተብለው እስር ቤት በታጎሩባት ኢትዮጵያ ጉዳዩን እስኪ ላስጠናው ላጥናው ያለ የሃይማኖት መሪም ይሁን የሃይማኖት ሃራጥቃ የለም። እንዲሁም በታሰሩ ሰዎች እና በአሳሪዎች መካከል እርቀ ሰላም እንዲወርድ ለወደፊቱ ስህተቶች ካሉ እንዳይደገሙ ነገሮችን ለማግባባት እና ለማቻቻል የፈቀደ አንድም የሃይማኖት መሪ የለም። ይብስኑ የሃይማኖት መሪዎቹ በየስብሰባው እና በየጭብጨባው ዜጎች የመንግስታዊ ሽብር ዱላ ሰለባ እንዲሆኑ እያበረታቱ ይገኛሉ ።

የዜጎች ሁኔታ ያሳሰባቸው የሃይማኖት መሪዎች በከፍተኛ ዛቻ እና ማስፈራራት እንዲሁም በጥቅም በማሰር እንዳይንቀሳቀሱ አሊያም በተዘዋዋሪ ባልሰሩት ወንጀል ለማጥመድ ሴራ በመጎንጎን እያስፈራሩ የህዝቦችን የሰብ አዊ መብት ጥያቄዎች እንዳያነሱ በማስደንገጥ እንዲሁም በጥቅማ ጥቅም እና በገንዘብ በመደለል አባትነታቸውን ለስጋዊ ባለስልጣናት እንዲሸጡ እና የፖለቲካ ምንዝር እንዲፍጽሙ እየተደረገ ሲገኝ ይህንን የምንዝር ጌጥ ከመለማመዳቸው የመጣ የሃይማኖት አባቶች ከጨቋኞች ብሰው በሕዝብ ላይ ከፍተኛ በደል እንዲፈስም ከባዱን ሚና እየተቻውቱ ይገኛሉ ።

የሃይማኖት አባቶች ሰጥ ለጥ ብለው ስለልማት ብቻ እንዲሰብኩ የእስላሙንም ሆነ የክርስቲያኑን ጥያቄዎች በተገኙበት እንድያስተጋቡ ማስጠንቀቂያ ከተሰጣቸው አባቶች መካከል አቡነ ማትያስ አቡነ ሉቃስ እና ሌሎችም ተጠቃሾች ናቸው እንዲሁም የወያኔ መንግስት በቅርቡ ለሾማቸው የእስልምና ምክር ቢት ሼሆችን ከፍተኛ የሆነ ምክር አዘል ማስጠንቀቂያ አስተላልፏል። እኔ ስጨፈጭፍ እናንተ አጨብጭቡ የሚለው አሸባሪው የወያኒ መንግስት ሃይማኖቶችን በራሱ አይዲኦሎጂ በመቀጽ ቀሚሳቸውን ያንዥረገጉ ሰላዮችን እና የሃይማኖት ነቅእዞችን በመመደብ ዜጎችን በተመለከተ የሚደርሱ በደሎች እና ገፈፋዎች ጠያቂ እንዳያገኙ አስታራቂ እንዳይሹ አድርጓል። ፓትርያርኩ ተንገላተው ከተለቀቁ በኋላ በማህበራዊ ድህረገጾች ላይ ብዕራቸው ለምን ታቀበ? ከፋሲካ ክብረ በአል በኋላ በትዊተር ላይ እንዳልተገኙ የሚነገርላቸው ፓትርያርኩ ራሳቸውን ከማንኛውም አንደፋዳፊ ንግግር በመቆጠብ በተረጋጋ መልኩ አንገታቸውን እንዲሰብሩ እና በቅርባቸው ለተመደቡላቸው የመንግስት ደህንነቶች /አማካሪዎች ተገዢ እንዲሆኑ ተደርጓል።

ዜጎቹን የማይታደግ የሃይማኖት መሪ ቆቡን አውልቆ ከፖለቲካው ጎላ ልኢቀላቀል አሊያም ገለልተኛ ሰው ሆኖ እንዲቀመጥ ለመምከር እንፈልጋለን ። በኢትዮጵያ ውስጥ ያሉ ሃይምኖቶች ለመንግስታዊ ሽብር ተገዢ እና ታዛዥ እንዲሁም የሽብር ሰባኪ ሆነው ዜጎችን በአደባባይ እያስግደሉ ዜጎች ከሞቱ በኋላ በሃይማኖታቸው ስር አት እና ደንብ እንዳይቀበሩ ተጽእኖ በማድረግ ለምድራዊው የጨቋኝ ምደብ ተባባሪ እና አስተባባሪ በመሆን ከባድ ወንጀል እየፈጸሙ ይገኛሉ። ስለዚህ በዜጎች ላይ የሚደርሱ በደሎች የማይቆረቁራቸው የሃይማኖት አባቶች ሊወገዱ ይገባል።

ማሳሰቢያ ፦ በዛሬው እለት በኦርቶዶክስ በእስልምና በካቶሊክ እና ከመካነ እየሱስ ቤተክርስቲያን የተዘዋወረው የበጎ አድራጎት ድርጅቶች ቡድን ያሰባሰበውን ጉድ የያዘ መረጃ በቅርቡ በይፋ እናወጣዋለን ይጠብቁን።


Ethiopia : Tewodros Beharu: The terrorist prosecutor


በሙስና መዘዝ ቀጣይ ትውልድ፣ ሕዝብና አገር በስጋት ላይ ናቸው፡፡

ሙስና በኢትዮጵያ ውስጥ ተስፋፍቶ መንግስታዊ ሽብርተኝነትን አማክሎ በአጭር ጊዜ ውስጥ የሕዝብ ዋይታ፣ ለቅሶ ለመሆኑ በቅቷል፡፡ ቢሮክራሲው በሙስና ተዘፍቆ ለስራ ሂደቶች ማነቆ ሆኗል፣ የልማት እንቅስቃሴዎች በመንግስት ሹመኞች ሙስና ተሰነካክለዋል፣ ይህ ነው ለማለት በሚያዳግት ደረጃ ሙስናን ታኮ ግለኝነት ተንሰራፍቷል፣ ስግብግብነት፣ አልጠግብ ባይነትና ማህበራዊ ቀውሶች መገለጫዎቻችን ሆነዋል፡፡ ከጥቂት ዓመታት በኋላ የመንግስት ለውጥን ተከትሎ የኢትዮጵያ እስር ቤቶችን የሚጨናነቁት በደረቅ ወንጀለኞችና በፖለቲካ እስረኞች ከመሆን ይልቅ በሙስና በተጨማለቁ የመንግስት ሹመኞች፣ የመከላከያ ሰራዊት አባላት፣ የሃይማኖት መሪዎችና ነጋዴዎች እንደሚሆን ጥርጥር የለውም፡፡ምንሊክ ሳልሳዊ ብሎግፖስት 

ነቀዝ የወጋው ሰብልና ሙስና የነገሰበት ሃገር አንድ ናቸው። ሰብሉ ፍሬ አያሰጥም፡፡ በሃገር ላይም እንዲሁ ነው፡፡ ሃገር ለመገንባት የሚታቀዱ እልህ አስጨራሽ ውጣ ውረዶች ጊዜ፣ ገንዘብ፣ ጉልበት ፈጅተው ፍሬያቸው ሳይታይ ሙስናው ከንቱ ያስቀራቸዋል፡፡ ከታሪክ እንደምንማረው ሙስና ከጦርነት የከፋ አውዳሚ ጠላት ነው፡፡ እንደ ጦርነት በጥይት አረርና በእሳት ሃገርን ሲያወድም ላይታይ ይችላል፤ ነገር ግን ኢኮኖሚያዊ አቅምን፣ ስነልቦናን፣ የስራ ተነሳሽነትን፣ ትጋትን፣ መተሳሰብን አዳክሞ ሃገርን ወደ ድህነት አዘቅት የሚነዳ የሕዝብን ስነልቦናን በመስለብ አቅምን የሚያሽመደምድ ነው፡፡ በዚህም ምክንያት ሙስና ሃገርንና ወገንን ለመርዳት የሚተጉን፣ የተራቡትን፣ የታረዙትን፣ በበሽታ የሚሰቃዩትን እርም የመብላት ያህል አስነዋሪና አስከፊ ድርጊት ነው፡፡ ሙስና እኔ ብቻ ከሚል እንስሳዊ ባህርይ የሚመነጭና በተለይም ለመጠጥ፣ ለዝሙትና ለመንደላቀቅ ሲባል ሕጻን፣ አቅመ ደካም፣ ሴት፣ ወንድ፣ ሃገርና ህዝብ ሳይል የሰው ዘርን ሕልውና የሚፈታተን ስነልቦናዊ፣ ማህበራዊ፣ ኢኮኖሚያዊ ቀውስ ነው፡፡

ዛሬ ሙስና ከኢህአዴግ አልጋ ተጋድሞ ወደ መንግስታዊ ተቋማት፣ ነጋዴው ማህበረሰብ፣ የትምህርትና የሃይማኖት ተቋማት እንደ ወረርሽኝ እየተዛመተ ማህበረሰቡን በሰፊው እየበከለ ይገኛል፡፡ ይህንን ጉዳይ ይበልጥ አሳዛኝ የሚያደርገው ደግሞ ሙስና ይጸየፋሉ የሚባሉት የሃይማኖት ተቋምትንና የትምህርት ተቋማትን መበከሉ ነው፡፡ በቅርብ ጊዜያትም ሙስና በሃይማኖት ተቋማቱ ውስጥ ከመዛመት አልፎ ወደ ጥቅም ግጭት በማምራቱ ተቋማቱ በሚያሳዝን ደረጃ የጋዜጦች መዘባበቻና ማሻሻጫ ሲሆኑ ለማየት በቅተናል፡፡ ሙስና ብቁ ዜጋ ለመፍጠር መሰረት ናቸው ወደሚባሉት የትምህርት ተቋማት ዘልቆ በመግባት የመማር ማስተማር ሂደቱን ከመበረዝ አልፎ ውጤት በሙስና እስከመገዛት መደረሱን ለማየት በቅተናል፡፡
ምንሊክ ሳልሳዊ ብሎግፖስት
 

ዛሬ በኢትየጵያ ውስጥ ቁሳዊ ሙስና እጅና እግር አውጥቶ በሕዝብ ሃብት ላይ እየተጫወተ ይገኛል፡፡ ሃምሳም ስልሳም ሚሊዮን ብር እንደ ቀልድ ከመንግስት ካዝና ሲጠፋ መስማትና እነ እገሌና እነ እንቶኔ ተጠርጥረው ስለተያዙ የተዘረፈውን ለማስመለስ ጥረት ላይ ነን ማለት የተለመደ ሆኗል፡፡ ዘራፊው መጀመርያ ወንጀሉን ያምናል፡፡ ቀጥሎ ከዘረፋው ምንዳ ውስጥ ፍርፋሪ ቆንጥሮ በመስጠት ፣ አምስትና አስር ዓመት ይፈረድበታል፡፡ ለአንድ አመት አስር ሚሊዮን ነው! ምን ችግር አለው! ለጥቆም ደግሞ በአመክሮ ወይም በምህረት መፈታት አለ፡፡

የመንግስት ሹመኞችና ባለሟሎቹ የሙስናን በሽታውን ወደ ሕዝብ ነዝተውታል፡፡ ነጋዴው ማህበረሰብ እንደወትሮው ወጭ ገቢውን የሚያሰላው ከቀጥተኛ ወጭው ጋር ያተያያዘውን ግዢና ግብር ብቻ አይደለም፡፡ የቀን ጅብ ለሆኑ ሙሰኞች የሚሰጠውን ኮሚሽንና ውጣ ወረዱን ጭምር ነው። ይህ አልበቃ ካለ ደግሞ ግልጽነት በጎደለው ፖሊሲ እየታገዘ አርቴፊሺያል ጭማሪውን ሊያቀጣጥል ይችላል፡፡
 

ሕዝቡ የኑሮ ውድነት ከበደኝ! የእቃ ዋጋ ንረት አስመረረኝ! ግፍ በዛብኝ! ሸምቶ መቃመስ አቃኝ የሚል ምሬት ሲያሰማ.. ሹመኞች አፍ ለማስያዝንና ለማሸማቀቅ ይሽቀዳደማሉ፡፡ “በገበያ ስርዓት ነው የምንመራው የሚችል ይገዛል፡፡ ያልቻለ አይገዛም” ይባላል፡፡ ገፋ ሲልም “አጭበርባሪ ነጋዴ ስናሳድድ አንገኝም!” የሚል ማበረታቻ አከል መልስ ለሕዝቡ ይሰጣል፡፡
የተረጋጋ የነበረውን የግብይይት ስርዓት ያለበቂ መነሻና ጥናት የዋጋ ጣራ በማወጅ፣ ውቅያኖሱን ደብድቦ አሳውን የሚረብሽ ፖሊሲ ይዘረጋል፡፡ አለመረጋጋቱን ታኮ ነጋዴው እጥረትን፣ የጥራት ችግርን፣ ቅሸባን፣ ሚዛን ማጓደልን አይነተኛ የስራውና የትርፉ መሰረት ያደርገዋል፡፡ ሕዝብ፤ ሙስና እየነዳ ላመጣው ግፍ ለዋጋ ንረት፣ ለኑሮ ውድነት፣ ለኢኮኖሚያዊና ማህበራዊ ቀውስ ተዳርጓል፡፡
እንዲህ እየተደጋገፉና እየተመቻቹ የሚሄዱ የስልጣንና የጥቂት ነጋዴዎች ሙሰኝነት ስር እየሰደደ ባህል ሆኖዋል፤ መስራትና ማጭበርበር ልዩነታቸው እየጠፋ ነው፡፡ በይና አስበይ በአንድ ቦይ እየፈሰሱ ማን ማንን ይገስጻል፡፡ የሕግ ውክልና የተሰጠው ሹመኛና ሙሰኛ ነጋዴ የሙስናው ፍሬ እኩል ተቋዳሽ ከሆኑ ሕግ ማስከበርም ሆነ ማክበር ፈጽሞ ያዳግታል፡፡ሙሰኛ ነጋዴውም ዋጋ ለማናርና ለመቆለል ምክንያትም ሆነ ስጋት የለውም፡፡ በአቦ በስላሴ እያማካኙ ቀን በቀን ዋጋ መቆለል ነው፡፡
በሙስና መዘዝ ቀጣይ ትውልድ፣ ሕዝብና አገር በስጋት ላይ ናቸው፡፡
ምንሊክ ሳልሳዊ ብሎግፖስት

 ሙስና ከስልጣን ጋር ተጋብቶ እንደ ሸረሪት ድር ተወሳስቧል፡፡ ለማን አቤት ይባላል! ማንስ ያዳምጣል! መፍትሔስ ከወዴት ይገኛል? ማለት ውሎ አድሮ ቀመሩ “ሙስናን ማጋለጥ ለመላላጥ” ወደ ሚል ከባድ ፍርሃት እንዳይለወጥ በቅጡ ማሰብ የግድ የሚልበት ጊዜ ላይ ነን፡፡
 ምንሊክ ሳልሳዊ ብሎግፖስት